Ski - il sport naziunal

Dals numerus „sports naziunals“ è l’ir cun skis, collià cun il mitos da la muntogna, francà spezialmain ferm en l’identitad naziunala. Il sport da skis ha fatg nascher intgins dals pli gronds eroxs da la Svizra contemporana. Blers fans sa regordan dad els anc ditg suenter che quels han gì lur gronds success.

Las pli grondas victorias han cuntanschì ils sportists d’enviern en faver dal 1972 als gieus olimpics a Sapporo, en Giapun. La giuvna Marie-Theres Nadig (17 onns) batta tut las favuritas e gudogna la medaglia d’aur en la cursa rapida ed en il slalom gigant. Tar la cursa rapida dals umens gudogna Bernhard Russi avant Roland Collombin. La delegaziun olimpica da la Svizra, cun Adolf Ogi a la testa sco directur tecnic, porta a chasa medaglias sco anc mai – ella cuntanscha en la bilantscha da medaglias la terza plazza, suenter l’Uniun sovietica e la DDR.

Il segund punct culminant furman ils resultats al campiunadi mundial da skis dal 1987 a Crans-Montana. Otg da diesch titels al campiunadi mundial e totalmain 14 medaglias van a la Svizra. Maria Walliser, Vreni Schneider, Erika Hess, Peter Müller e Pirmin Zurbriggen domineschan il sport da skis internaziunal. En december da quel onn vegn elegì Adolf Ogi, anc adina en buna memoria pervi dals resultats da Sapporo, sco cusseglier federal.

Suenter che la generaziun victura s’ha retratga dal sport datti adina pli paucs success. L’entira Svizra crititgescha che la Federaziun da skis haja negligì la lavur da promoziun da la generaziun giuvna. I vegn era deplorà che il sport da skis perdia sia attractivitad e che la giuventetgna na saja betg pli pronta da purtar prestaziun…